حلم بسريرين
==========
قول انك رايح تكتب قصه جديده ..
ومش ح تغيب .
إن الأحلام لمّا ب تاخدك
حتماً ب تروح من غير ترتيب !!
أنا وانت بقى لنا كتير عارفين رايحين على فين
بس انا مستغرب
ليه ماحجزتش ليّا وليك حلم بسريرين !!
وف آخر مَرّه مشيت ماشربتش حتى الشاى !!
إزاى تحجز ف القطر الرايح
وانا كنت حاجز لَك ف القطر الجاى ؟
زعلان منك يا احمد
ولأول مَرّه أحس بإنك صاحب أى كلام
إنك كداب .. زى الأفلام
إن الأسبوع بقا عندك كُلُّه السبت
إنك غَفّلت الدنيا
غمّيتها .. وف لحظه هَرَبت
أنا برضو كمان متغاظ منّك
و ح اخبّى عليك آخر ماكتبت
مش مسموح لك تقرا وتعمل إعجاب
ولا ح اكتب لَك إهداء على أى كتاب
يمكن أكتب لَك على تذكرة القطر
أبدأ ب نهايه ف أول سطر
واختم ب شروع ف حياه تانيه
أنا وانت شبعنا من الدنيا
واتكرَّعنا
وعافرنا كتير لمَّا وقعنا
بس ماقومناش
وف عز ماكان الموت ببلاش
قررنا نعيش
ونكوّن جيش
يترص كلام فوق الاوراق
لاهو مُغمَى عليه .. ولافاق
لكن دَخَّلنا ف جمعيه
نقبض نفرين
نحجز عمرين
ف القطر الجاى
بس انت مشيت .. ماشربتش حتى الشاى
من غير ما تقول ح تروح على فين
ليه يا احمد ماحجزتش لينا حلم بسريرين ؟
__________________
أحمد .. هو القاص والروائى الراحل والإنسان الرائع أحمد قاصد