ادب ايه وحلاوة ايه... والله الميري لايق عليه
طول بعرض بيضه ايديه.. يارب احميه وخليه
رايح لقدره واللي انكتب ليه... يحمي بلده من ولاد الايه
كل يوم احلف عليه...... اقوله بلدك واوصيه
شبر واحد ما تفرط فيه.... تحميه بروحك وتفديه
قاللي حاضر يا ام البيه.... هاسمع كلامك واعمل بيه
بس هاخد عليكي عهد وتصونيه.. لو ما رجعت قلبك ما توجعيه
ولا تقولي كلام ربي ما يرضي بيه... هكون شهيد وده اللي تدعيه
خايف اقولك راجع................ وعد وما اقدر اوفيه
ادعي ربك واترجيه..... ارجعلك سالم واحققلك كل اللي تتمنيه
إن شاء الله هترجع والنصر تيجي بيه... والارهاب بعون الله تقضي عليه
لكن ولاد الحرام غدروا بيه.... ضربوه بصاروخ واربيجيه
من غير رحمه غاروا عليه......نار من فوقيه وتحتيه
والله ما حزن والديه.... ده راح شهيد عند ربيه
عريس متزين الله عليه ..... يا ام الشهيد يلا زفيه
لجنة الخلد يلا وديه... وعليكي بالصبر حتي تلاقيه
والله عايش ماماتش البيه..... حي يرزق مش كده ولا ايه
وعد ربي ليه........ والحور العين تتلهف عليه
...
حسبنا الله ونعم الوكيل.....
.....ابوزمان......