*******
في يوم دق الباب ... قلت افتح وأشوف مين
لقيت الحب واقف وبيضحك ... وبيغمز لي بالعين
استغربت أوي لضحكته أصلة مازارنيش من سنين
ودخل وقاللي .. إيه الأسئلة اللي في عنيك الاتنين
وماستناش الإجابة وجاوبني هو .. بلمسة الإيدين
حسيت برعشة فهمها هو وجاوب ببسمة العـين
بسمتة قالت ماتتعشمش انا جاي أزورك لسببين
الأولاني ياصاحبي ...
عشان واحشني وعارف انك مظلوم من سنين
أما التاني عشان متزعلش مني وتعذرني
ومتكرهنيش ولا تخليني من الظالمين
ومش هالومك أبدا لو ظنيت فيا زي
الزمن والقدر ... وحظك الوحش مع السنين
أصل دورك في الحب لسة مجاش يا نن العين
وضحكت من حزني أو استغرابي مش عارف !
بس كان جوايا القرار ... والقرار كان من سنين
الحب مات في قلبي ومن قلبي رميته من سنين
وأعلنت الحداد بعـد ما دفنت قلبي ودموع العين
وكنت بسأل نفسي ليه أنا كده .. هو أنا من الملاعين
ودورت وشي للدنيا
ونسيت وقلت أعيش زي الناس ماعايشين
ولو جه الحب أهلا وسهلا .. ولو مجاش برده ماشية السنين
ومنعت الدمعة وسيبت الضحكة تنزل وتداوي العين
فيها ايه يعني لو عشت كده ... أكيد أنا من الكسبانين
مش يمكن لو جه الحب أندم ... وأكون زعيم الندمانين
خليني كده أحسن دي رحمة ربنا أرحم عليا من البني أدمين
بدال ما أقابل وحدة تكرهني في اللي فات والجاي مع السنين
وانت ياحب مش زعلان منك ولا عليك .. ولا عليك هتدمع العين
( بقلـمي / عمـاد المأمور )
********************