- وحكاية الواد حنفي
-الودا حنفي ، دمه خفيف ،
وشكله ظريف
- مسبسب شعره ، و جسمه نحيف
- بيحب الكورة ، والتعليق
تسمع منه ، تقول حريف
- ودا كان وصفه ، قبل كورونا !!!
- ومن الحبسة . . وكان زهقان
قال لنفسه . . . وكان غلطان
هخرج خِلسه . . وأنا عشمان
أشوف الدنيا . . . .
- الواد حنفي بره البيت ، قاعد مزوي
جنب الحيط . . .
ف بقه لبان ( علكة )
وكان سرحان . . .
- عَمّال ينضف ف شعر
أنفه . . .
أم جات له عطسه
بص خلفه . . .
الواد من خوفه
ضرب ف كفوفه
حد يشوفه
يقول دا كورونا . . .
- جري ع البيت
وكان محسور . . .
لونه مخطوف
يلف يدور ، حوالين
نفسه . . .
و بأثر العطسه
مخاطه منه نازل سلسوب
من كتر الخضة بقى مرعوب
ليجيله فطسة . .
جن جنانه
و فكه يخبط
ف سنانه
دخل الحجز ( يحجز نفسه )
جوّه الأوضه
لابس تيشرت ، وبرمودة
قال لنفسه . . أمام مرايته
يا ليله سوده . . .
كنت مفكر انها موضه
لفحة برد ، جابت لي
كورونا
لو حد شافني ، وخاد لي صورة
وجات ع النت . . .
والناس ما بترحمش
هيكفرونا !!
قام اتوضى . . وصلى وتاب
وقال لمرايته ( وهى حبيبته)!!
كورونا عذاب . . .
أول مره . . وآخر مره
أسيب البيت . . وأطلع بره
وأحدث نفسي . . وإيدي ف أنفي
وأي كلام عن الفيروس
أهرب منه . . وأنا حريف
ألف وادور ، وأي كلام
مش ع الكيف
على طول هنفي
بس اعمل ايه ف التلفاز ؟؟؟
ولا النت . . وأنا ع الفيس
اصحابي عزاز
أحسن حاجه . .
أتغطى واناااام
واهرب حتى
من الأحلام
~~~~~~~~~~ حمدي عودة
الرسالة وصلت . . ؟؟؟