شعر / سعاد سعد
الحظ تاه وبقاله مدة ماجاش
مستنياه ودا راكب القشاش
دا اللي يفوته القطر م الأول
حزين وباع العمر كله بلاش
الضربة قاضية يا خريف العمر
كل الدروب تخاريف قفلت ما لاقيه ممر
وقع الورق حتى الفروع من جرحها دبلت
الجدر مقهور ومغصوب على شراب المر
ما هو مش جديد داالحظ مات ودفته عمنول
عمري جفاه السعد م الاول
الفرح روح وجاحد مش عاوز ييجى
البخت مال طب ليه هنتسول
انا حلمى ماهوش كبير الستر والصحة
يا مقلعة الغلبان حنى وطبطبى..سترك يا دوب قصاقيص
دى احلامنا ف الانعاش تحلف ماهى صحة
يا مدلعة التعبان دا عريس هواكى .. منعماه بيهيص
القلب شقق من صداكى يا آه
لون الصباح شبه المسا وسماه
كفن الفضيلة وغسلها من مر دمع الصبر
ما يحوش وجعنا غير أيادى الله
كان يجرا أيه لو غاب نهار فى ربيع
الشمس كانت شمس .. يعشقها ألف نهار
ولا القمر كان فات اماله تضيع
العمر كان أخضر يعشق ندى الأنهار
جه العربس من فرحته عشمان بينزل الطرحة
الدنيا بخلت وضاقت ما ادتش يوم فرحة
حداية إيه يا جدع هتحدفك كتاكيت
هانت عليه دنيته لاقاها مش طارحة
الكون عريس وعروسته خدها الوبا
الدنيا قفلت بيبانها والاخرة مش فاتحة
مغزول بصبر ايوب معجون بطين الأرض يا توب الصبا
نقرا الآيات المنجيات فى الفرض من قلبنا ونردد الفاتحة
إعقلها روق بقى وحس بالمخاليق
حاسب زمان غفلتك قم للإله أولى
ضاقت ولما استحكمت واتقفل ابوابها ف قلوبنا الف طريق
إرمى توكالك عليها هنسيبها للمولى