شعر /سعاد سعد
البحر الميت راح يصحى
بقلوبنا الحلوة المسئولة
والجبر هيتعلم إحصا
ودا درس الوحدة ف سنة أولى
البحر الابيض غضبان
دا ف قلبه ييجى 100تعبان
مش لاقى مرسى ولا شط
ليه هربت كل الالوان
لو تنطق أهرمنا تقول
ليه ضيعنا من كام 100 حول
دا الجبر هيعقل ويهندس
مين فرط او مين مسئول
لعيبة ولا فيش ولا جون
وبنغلط ونقول صهيون
حسابتنا دايما مغلوطة
مين باعنا وقبض العربون
يا اما جوعنا وطفحنا الكوته
وادى موزة حلوة صغنتوته
واد خدها وركبوا الليموزيه
مجنونة وسلمتى يا قوطه
وبنلبس وبناكل قسط
والعمر بقى جاهز فاست
ربى ارحم اهل المحروسة
ليه نسيوا الابريق والطشت
نحسبها واهو عدي ايام
خاف منا واتغرب سام
دى النهضه ضعفانه ورضيعة
ليه بعنا وسلمنا الشام
وعراقنا بقى سنة وشيعة
مين فرق وعملها قطيعة
وأمالنا فى الوحدة اهو خاب
مين قسم وخد التربيعة
وبنشجب ونننام ونخمر
ووطنا بقى مشوى محمر
وبقينا بطيخ ع المكسر
والحلم بقى رز معمر
ودواعش وضروس وانياب
وعدوين بالامس احباب
وجهادنا بقى ليه سبوبة
وقفلنا والعز اهوغاب
دا البحر الاحمر باع دمه
من ويله وعذابه وهمه
ليه سكتنا ولبسنا لجام
يتمرجح مافى شط يضمه
اه يا امة ماتزيحوا الغمة
وحدتنا فيها عز وهمة
وبلاش الحسبة المقلوبة
بإيدينا هنطلع ع القمة