مشروع إله
=========
طوبى لكم يامعيز
مالكومشى ف المهاميز
لا قولتوا إحنا أسود
وقهرتوا كل عزيز
ولا خَدتوا دور البطل
وسوقتوا فيها ب هَطَل
لمَّا اللى فاق .. اتسطَل
وطلعتوا م الأراجيز
طوبى لكم .. واحنا لنا .. طوبه
أشباه بشر .. أرواحنا معطوبه
بدون ربيع ..
كل الشهور .. طوبه .
لسّه ف محطة مصر قطر أليف
ب يجر نفسه من رصيف لرصيف
يدوَّخ الغلبان .. كأنه رغيف
صوت الندا فى الودن .. ب يسلطَن
بياع خُضار .. ب الهم متسرطَن
وفَرش فَرَّح حماده . إللى مابيفرحش
وشجَر مفرَّع .. بس مابيطرحش
غير العوادم .. غوله ف الزحمه
اكشاك أشاوس حاربوا ب اللحمه
وضحّوا .. ب الفشَّه .. و ب الممبار
طوبى كمان ليكم ياكل حمار
سارح ف غيط .. أو شادد الكارّو
أشرف كتير م اللى ب يتقَرّوا
وما ينطقوش أبداّ بلا تلقين
متصنفين أسياد ورا الفتارين
حَفَروا ف جبينهم آية الكرسى
وللحجاره .. أول الساجدين .
واشرف كتير من ييجى 100 عِمَّه
بتقدِّم الفتوى ب 100 ذمَّه
دلوقتى صح .. وبعد ساعه حرام
وشوش جديده لكهنة الأصنام
وجهين لعمله فى الجحيم تتحشر .
طوبى لكم .. أنتم كمان يابقر
حليب قلوبكم ..
سُود قلوب البَشَر
البعض شِتمَه واعره .. مش إنتم
لا يوم نقضتم عَهد .. ولا خونتم
ولا بعتوا أرض ب حزمتين برسيم
كانت بدايه ..
و .. سين .. تجر الميم .
ولا حَد فيكم جَاهِر إنُّه عليم
مشروع إله ع العضم .. فى التشطيب
ب يعبدوه .. بالرقص .. والتحطيب
ويخَبّوا ريحتُه بالورود والطيب
تفضل نَتانَه يضج منها الهوا .
طوبى لكم .. واحنا حجر سِجِّيل
آخر عساكر من جيوش الفيل
ظَهَر ف أرض المعركه بينهم
أشكال جديده .. من طيور أبابيل .