إلا أمك
كل الناس ممكن تبيعك
إلا امك تشتريك
ولما كل الناس تهينك
تيجي هى وتراضيك
تيجي زى النسمة عادى
بس اوع ف يوم تعادى
ربك لما انت تعاديها
ولما ترضي هى عليك
يا فرحتك
دى الجنة تحت رجليها
كل الناس ممكن تنام
إلا هى ما بتنمش
لما يبقي بيك آلام
قلبها ما يتحملش
واللي يقول عنك كلام
بتعاديه ومتسمعش
كل الناس ممكن تنساك
إلا امك تحتويك
ولما الدنيا تبقي معنداك
تيجيي هى وتقويك
كل الناس ممكن تفوتك
لما تبقي في يوم حزين
وهى بس تسمع سكوتك
وقلبها يبكي بأنين
كل الناس ممكن تقولك
أيو يا ابني انا زى أمك
إلا هى متقولهاش
لكن لما قلبها يضمك
تعرف إنه مش غشاش
كل الناس تفرح لفرحك
بس مش زى فرحها
ولا مين يحزن لجرحك
دى كإنها هى جراحها
كل الناس مش زيها
مهما كانو كتير ولمة
ومتقارنش في حبها
لا تقول خالة ولا عمة
طول ما هى جنب منك
انت عايش من رضاها
ولو اخدها الموت منك
انت بتعيش بدعاها
كل الناس تشيل همك
بس مين يقدر يكمل
هفضل اقول إلا امك إلا امك
وانت فكر فيها وإتأمل
إلا أمك
كلماتى /أحمد سنجر