زمَّار الحى
=========
رَفْع الحاجب
مش بس عشان الدهشه
فى الغالب .. يبقى محاوله ل فَتْح العين
لحياه إجبارى
- ولو كِذبَه -
وخروج القلب من الحِسبَه
بعد أما ب يتعِب صاحبه ..
وما تشيلهوش رجلين .
والدنيا تكون قُفِة أحلام
من غير ودنين !!
زمّار الحى يا شِعر .. لا جِه .. ولا راح
ب يريَّح ناس ..
إنَّما عمرُه أبداً ما ارتاح !!
فى الفَرْح .. لا صاحب .. ولا معزوم !!
واذا جِه .. ب يصوم !!
وف هَم الخَلق .. ب يبقى نصيبُه الإستفتاح !!
أنا لمَّا بازمَّر .. ب اتذمَّر
الكلمه ف حلقى ب تتنمَّر
وتجينى ف نومى ..
وتفزعنى زى الأشباح !!
وتحاصر كل ما احب وأهوى
تقبض على روحى
وانا أقبض ع القهوه
نتقابل بالأحضان
وأحط كلابش ف إيدى وإيدها ..
ف زنزانة دخان .
وتشوفنى .. حبيب
وانا اشوفها .. ملاكى
نرقص .. على كل النغم الباكى
أحضنها بصدر .. لا .. كان .. ولا عاش
ألاقيها ب تُجبُر روحى بشاش
و ب تكبس جرح القلب ب حبة بن
رَفْع الحاجب
أحياناً يبقى يادوب للإستنكار العاجز
للحزن الناجز
متوفّر يوصل جاهز
من غير ( order ) ع النت ..
ولا بتليفون .
صابح جداً .. إنتاج اليوم
لخلايق كل تاريخ انتاجها قديم
ولا ليها عيون
ولا قلب سليم
لو شافوا فَرَح .. يتمنّوا الكَرب
أحرار ب قلوب لسبايا الحَرب
وضهور ماتكلِّش يوم م الضرب
ولسان مايكلِّش م الشكوى
زمَّار الحى .. ماهوش مأوى
مش أكتر من زنزانه من الدخان
وهموم أشكال والوان
ومحاوله لفتح العين
من قلب مابتشيلهوش رجلين
مع دنيا .. يادوبك .. قُفَّه بدون ودنين !!