----------------.
قولليّ ايه معنى تحرش وأغتصاب
قولليّ ليه حلم البراءة
نحوله لخوف وإكتئاب
قوللي ايه معناها بنت
ينهشوا فيها الكلاب
الحكاية موت مبادىء
وضمير في قلوبنا غاب
الحكاية بُعدنا عن دين نبينا
والوصايا اللى ذكرها ربنا جوا الكتاب
-------------.
التحرش مش بلمسة ومد ايد
أو بكلمة أو بهمسة من بعيد
التحرش أني أهينك
جوا عملك أو في بيتك
التحرش بالمغازلة والصفير
أو كلام خارج وجارح
من ديابة بدون ضمير
التحرش أعتداء ع الإنسانية
والبُعاد عن ربنا دُنيا ودين
-----------.
العلاج ميكونش بتعقيم الرجال
العلاج ميكونش بتنقيب الحريم
العلاج في فن راقي
وحوار هادف أصيل
العلاج بحكم رادع
وعقاب ملوش مثيل
وأن ديني يبقى حصني
وان ربي يكون دليل
وأم بتربي تعلم
جيل بينتج مش عويل
وأب بيكون لينا قدوة
يرعى أهله وبضمير
يومها راح تنهض بلادنا
وراح نخطي المستحيل
هي دي أصل الحكاية
وهو ده الأمل الكبير
-----------.
شعر/محمد توفيق
مصر-بورسعيد