(7)
_ لوتسمحلي دولت الرئيس .. إحنا في هيئة الاستعلامات نسقنا مع التليفزيون المصري من خلال شريط متحرك أسفل كل شاشات قنواتنا من اليوم تكون فيه تعليمات وارشادات لولادنا هناك في ووهان إزاي يتصرفوا من الآن ويتواصلوا كلهم مع السفارة من خلال we chat زي ماطلب سعادة السفير هناك لسرعة حصرهم
_ وكمان لازم يعرفوا ممنوع الخروج من أماكن سكنهم لحد ماتوصل ليهم الباصات اللي هتنقلهم للمطار.. ده بقى هيكون دور كل برامج التوك الشو اللي بيوجعو دماغنا كل ليلة .. يعملوا بقى حاجة مفيدة للبلد
_ دولت الرئيس أنا أصدرت تعليماتي بسفر موظف من الخارجية لينهي كل إجراءات ختم الجوازات بالوصول لولادنا جوه الطائرة لأن مافيش تعامل بأي شكل معاهم هنا لمايوصلوا بالمطار
_ بكده تقريبا إحنا غطينا كل الأمور المهمة .. وهنفضل على تواصل لحد مانطمن بانجاز المرحلة الاولى بخروج ولاد على خير من ووهان.. واجتماعنا القادم أول ماولادنا يركبوا الطائرة ..
.. وهنا في ووهان كانت وتيرة تحركاتنا تتسارع .. لأول مرة منذ مجيء لهذه المدينة أشعر بكل هذا التقارب مع إخواتنا المصريين اللي بيدرسوا او بيشتغلوا هنا .. بقينا كأسرة واحدة .. كلنا بقينا بنخاف هلى بعض .. مابقاش حد فينا لوحده .. حتى اللي قرروا يبقوا هنا وماينزلوش معانا .. كانوا برضو كلهم معانا .. ورغم خوفنا عليهم لأنهم هيبقوا هنا .. إلا إننا كنا كمان متفهمين لقرارهم بالبقاء خوفا على فقدانهم لشغلهم .. وتوالت اتصالاتنا ببعض وبأهلنا في مصر
_ ألو .. أمي .. طمنيني عليكي ياست الكل ..
_ أنا ياضنايا اللي بالي مشغول عليك وعلى بنتي حنان .. عاملين إيه دلوقتي ..
_ إطمني ياأمي .. والله إحنا بخير بفضل دعواتكم لينا .. وخلاص أهو بكره أو بعده هنكون عندكم بمصر
_ أيوه ياحبيبي عرفنا .. كتر خيره الريس هيبعت يجيبكم كلكم .. شفت بقى إنه مش زي ماكنت بتقول عنه .. كل حاجة بيعملها بتزيد غلاوته بقلبي والله ياابني
_ أيوة ياأمي عندك حق .. موقفه ده هيغير كتير من حكمنا عليه .. كلنا هنا مافيش سيرة غير عنه
_ طمني على حنان عاملة إيه .. إوعى تخليها تخرج من البيت .. ولا إنت كمان ياحبيبي
_إطمني ياست الكل حنان كويسة وبتسلم عليكي .. أهي عاوزة تكلمك
_ إزيك ياماما .. وحشتوني أوي كلكم ..وأمي عاملة إيه .. وحشتني جدا.. مش مصدقة روحي إني خلاص هنرجع ونشوفكم ..
_ وانتم والله ياضنايا وحشتونا كتير .. بقى كده هُونا عليكم ماتنزلوش سنتين .........
_ وحياتي ماتبكي ياماما .. مش هقدر أتحمل دموعك دي.......
_ خلاص ياأمي .. كفاية بُكا أرجوك .. حنان مقدرتش تكمل كلامها معاكي وبتبكي ...
_ غصب عني ياضنايا .. معلش سامحوني ..
_ إنتي اللي تسامحينا ياأمي .. خلاص هانت .. سلام .. في حفظ الله
_ ربنا يحفظكم ويتم نزولكم على خير يارب
الى اللقاء مع الحلقة (8)