(عن مقتل رضا مازن)
(جرا إيه للدنيا)
جرا إيه للدنيا يابا
كأننا عايشين فى غابه
القتل أصبح شيئ رخيص
والشر بيخَلف ديابه
▪︎▪︎▪︎
الدم هان فى كل حِته
والمطوه تنهى الروح بِغَتّه
والضعيف يتصفى جِتَه
على بعضها الناس متسابه
جرا إيه للدنيا يابا
▪︎▪︎▪︎
عبده موته فى الشوارع
فى البلطجه والسطو بارع
والشباب تايه وضايع
للتقوى مافيش استجابه
جرا إيه للدنيا يابا
▪︎▪︎▪︎
ده حصاد لدراما ساقطه
بتصور الإجرام فى لقطه
والسبب فى كل غلطه
التسيب فى الرقابه
جرا إيه للدنيا يابا
▪︎▪︎▪︎
الأخلاق فى عيوننا ماتت
والضمير من خوفه ساكت
علامات الآخرة بانت
والأمر لله والإنابه
جرا إيه للدنيا يابا
▪︎▪︎▪︎
ماعدش حد راضى يسامح
والغدر باين فى الملامح
واللى جاي زى اللى رايح
موالنا يتغنى بربابه
جرا إيه للدنيا يابا
▪︎▪︎▪︎
الإبن تربية أبوه
ع التسامح علموه
للضياع إوعو تسيبوه
يمشى فى دروب الخيابه
جرا إيه للدنيا يابا
▪︎▪︎▪︎
اللى حصل يوم الجمعه
حاجه للتربيه راجعه
حادثه جوه قلوبنا واجعه
ليها فى الإحساس إصابه
جرا إيه للدنيا يابا
▪︎▪︎▪︎
ألف رحمه على الضحيه
بأت خلاص حاجه عاديه
للشيطان أكبر تحيه
اللى نسَانَا الطيابه
جرى ايه للدنيا يابا
▪︎▪︎▪︎
النهارده رضا مازن
قَتْله زودنا محازن
باقول واعيدها ع المآذن
جرى للدنيا يابا
جرا إيه للدنيا يابا
▪︎▪︎▪︎
يارب جود وإهدى الشباب
للسنه رُدُو وللكتاب
شيل من على عينه الضباب
دعيت وعليك الإجابه
جرا إيه للدنيا يابا
كلمات
شاعر الإحساس
رضاعبدالحميد