كتبت بوستات
بتزود جرح العمر انين ، وبتقتل جوة القلب حاجات
كتبت بوستات
بتشمت فى هوايا اللايمين ، وتبدل فرح العمر آهات
والحب إللى اتجمعنا عليه ودع حكايتنا وعدى وفات
مش ناسي الجنة إللى اخترناها تلون بيننا حروف الشات
والحلم إللى اتشوقنا اليه بالحب نعيش فى تبات ونبات
والفرح بيحضن احلامنا والحب ينور ايامنا واللحظة الحلوة تمر ساعات
والشات الأخضر كنا عليه بالحب نعيش كل الأوقات
والقلب الاحمر بيزينه وتتسارع فى قلوبنا الدقات
أصبحنا اتنين أغراب عايشين
بتحاصر دوايرنا المتاهات
والشات الأخضر بعد الحب ده كله خلاص
اصبح دالوقتى نيران وشتات
كتبت بوستات
بتقول الدنيا ف ظل غيابي جميلة ونور
و الدنيا دى زى سفينة جميلة تسر العين وتلف بحور
وعليها تبص ف زاوية بعيد بتلاقى مكان خالى ومهجور
كانت بتشبه حبنا بيه ولا كنت اتخيل مقصودها ولا عقلى يدور
كتبت بتقول دنيا جميلة وان هوانا اصبح جانب مظلم عالارض
معقولة يا ناس يبق هوانا فعلا جانب مظلم عالارض؟
انا كنت بحبك حب جنون وبطيربك سابع سما وانزل ثابت عالارض
كان حبي لكل الناس سنة و عشقك جوايا شريعة وفرض
تخطفنى الدنيا باوجاعها بغرامك اتحدى خداعها بالطول والعرض
وحلفت اصون ودك وحدك ويدوب المر بلون شهدك وتكونى ملاكى ليوم العرض
ولقيت القصة البهتانة
الحب اتحول لإهانة
بجحودك ضيعتى هوانا
ولقتنى يادوب حتة اراجوز
يسعد بدموعه نجوم العرض
وكتبت بوستات
كتبت بتقول ايه يعنى نقع ونقوم تانى والقصة ختامها وقوف وثبات
والافضل صدق النهايات مهما
يبهرنا جمال البدايات
واللى يبص وراه بعيونه
محروم من حسن الجيات
واللى بيشكر افضال غيره
بتصاحب روحه اللعنات
وكتبت بوستات
كنا بنعشق بنت جميلة فى قصة حزينة اسمها سارة
طول الوقت نغنى الغنوة إللى بتملانا حنين ونضارة
مين يظلم برائتها ويقدر . ليه النفس بسوء امارة
مين يوصف اوجاعى ويعزف حزنى وخوفى فى تتر الشارة
كان ياما كان
كان فيه عصفور
قلبه صغير ، ريشه قصير
حلمه يرفرف بره السور
كنت بعيط دم يا سارة نفسي عنيكى تشوف النور
إللى ينول حاجة بيعشقها ليه يكسرها بكل غرور
ولقتنى بكرر ماساتك نفس الحزن ونفس الدور
ليه إللى بنعشقهم دايما يبقو علينا سلاح مشهور
واللى بنمسح دمعة عينهم سابو خاطرنا يبات مكسور
دور دور ياعصفور
دايرة ولف عليك الدور
صيادك قاسي ومغرور
بكرة الظالم يطلب عفوك وانت تعيش فى جنان وقصور
دور دور ياعصفور
جنة خلد لا فيها مواجع ولا تعرف أحزان وكسور
دور دور ياعصفور
ربك رب الخير والنور
احمد ربك واحضن ضعفك تلقى الدنيا متاع وغرور
هيرفرف بالفرح جناحك وهيرجع لعنيك النور
ولا ترفع للحزن راياتك ولا تشرب للهم كاسات
كمل طيرك واسعد غيرك حزنك اصبح ماضى وفات
ريح بالك و اسعد حالك مهما تكون كتبت بوستات
وكتبت بوستات
بقلمى ...نبيل عبد الرحمن