قلمى / سعاد سعد
صباح الخير يا سيد ..صباح الخير يا نادية .. لابس جلبيتك الصوف والعمة البيضا ورايح فين كدة.. مصرعند جدك حسن ..خدنى معاك بيقولوا مصر ام الدنيا نفسى أشوفها أوى .. ههههههه اما تكبرى أخاف تقعى من القطر كلهم دول
يومين تلاتة وراجع ..هاتلى حاجة حلوة من ام الدنيا وسلملى عليها ..
هيييييه سيدى جا ..سيدى جا ..سلمواعليكوا ..جبت لنا إيه يا سيد ..إستنى يا مذغودة أما يقعد ..خدى يا شلبية فرقى على الولاد ..إيه دا يا حاج ..دا فضلت خيرك اللى بيقولوا عليه جاتوه و شكلاتة وشوية عين جمل على لوز على
فستق على بندق دول إدى لكل واحد تورة وشيلى الباقى بدلاب الحيطة اللى جنبى على الفرن اخويا حسن الله يوسع عليه عارف إنى بحب المكسرات ..يا حلاوة يا ما انتوا متمتعين يا اهل البندر ما تفتح لنا قهوة يا حاج بدل الارض اللى عمال تشتريها كل سنة .. إكتمى يا ولية.. إيييه يعنى هي الارض كانت بتجيب إيه ....اسكتى يا شلبيه الارض عرض ولا احلى من عيشة الفلاحين وبعدين القهوة مش كارنا مش هتمشى عندنا الفلاحين بيناموا من المغربيه عشان يقوموا يفلحوا الارض من بعد الفجرية .. البندر بيفطروا فول وطعميه وعيش من الطبونة وهما مستريحين ...
..اكتمى يا وليه ال فول وطعمية أال انتى بتفطرى قشطه وجبنه وبيض ولبن ورقاق وفطير .. يوووه يا حاج ساعات
نفسي بتروح لهم ..وبعدين عندنا خضرا وبراح وارض عفية ولادة حسن قاعد فى شبرا صحرا وغلبت اقله خد لك يا حسن كام فدان ينفعوك انت وولادك قاعد فى شقه اد الحق أى والله اد الحق أل بيقول دا انا قاعد فى إيجار قديم أقوله والملك يا حسن يقول دا احسن من الملك ..
لا يقولى فيه حته اسمها مصر الجديدة دى بقى صحرا ..
صحرا مافيهاش صريخ ابن يومين ببلاش .. لسانى نشف اقوله خد لك كام فدان هناك ..يقول هعمل بهم إيه يا حج محمد ... الملك عز يا حسن ينفعوا ولادك ويعنوهم الزمن له عصا عوجة يا حسن ..إحيينى النهاردة وموتنى بكرة ..
ونهر فلوس داخله يا شلبيه ليلاتى .. يرجع من برا شايل ومحمل ايشى فاكهه على لب وتسالى على مكسرات على جاتوه..إيه هى القهوة بتكسب كل دا يا حاج ..إيوة يا بت
دى قهوة فى ميدان خلوصى عارفة يعنى إيه فى ميدان
مانى عارف طالع خايب لمين جوز اخته شغال عنده بقى
حاجز شقق لولاده كلهم ودا عنده كوم لحم حتي مراته
مضيعة دخله على اهلها ومعيشاهم أحلها عيشة .. مرت شهور
ياحاج ..حاج .. فيه ايه بينادوا فى الجامع ..على إيه
يا ولية ..البقية فى حياتك تعيش انت مرات حسن اخوك
إن لله وإن إليه راجعون كانت جايه عند اهلها بتعمل عمليه
إجهاض دى بيقولوا يا قلبى اخدت حقنة زفت الطين اللي بيسموه بسللين ده... جهزى الجلبيه الصوف والعبايه وطلعى المحفظة من الدولاب وقولى لابنك يجهز التربة ويفرش الدوار ويتفق مع المقرئين ...
وبعد مرور عام سيدى راح مصر يطمن على سيدى حسن
خدنى معاه المره دى ..كنت صغيرة كل اللى كنت بفكر فيه
وبيداعب خيالى حياة البندر الفول والطعميه واللب والمكسرات و الجاتوة وفضلت مستنية ..مستنية سيدى محمد كان حزبن ما بيتكلمش ..شفت ولاد سيدى حسن وكان فيه واحدة عايشة معاهم وعلى رجلها عيل صغير بترضعه ...
قالولى انها مراتة ..قلت هى مش ماتت ..يا سيد ..
ضحكوا كلهم وسيدى زغدنى ..واحنا راجعين فى القطر
قلت له فين يا سيد الحاجات الحلوة اللى كنت بتكلمنا عنها وفين يا سيدى مصر ام الدنيا انا ما شفتهاش ..
جدى دور وشه يم الشباك وقالى الحال بقى غير الحال
سبحان مغير الاحوال سبحان من له الدوام ..
واما رجعنا بعد ما اتعشينا العيله كلها اتلمت حوالين سيدى
على الفرن وحكى أزاى حطت الدنيا على سيدى حسن
وإنه باع القهوة ..يا مرى باعها أزاى وكانت بتجيب له نهر فلوس ..الواد المفعوص الصغير ال الولاد فى المدرسة كانوا
بيقلوا له يا ابن القهوجى ..أم باع القهوة واخد محل بيقولوا عليه أدوات منزليه ده بيهش وينش الفقر عشش عليهم يا شلبيه ..قتل النفس يا حاج لأ ونزلوا عيل أهى مراتة الجديدة على رجلها عيل وحامل فى التانى وعليهم الفقر...ربنا ما بيتعندش يا شلبيه .. يا ياما نصحتك يا حسن ...
حتى الحتة بقت زحمة وطلعت كلها مبانى مصر اتبدلت بين يوم وليلة ...
ماليش دعوة يا سيد انا عاوزة اشوف ام الدنيا ..عاوزة ام الدنيا ...هههههههههههه ...هههههههههههه ينيلك يا مزغودة
بتجيبى الكلام دا منين ...
راح الزمن وجت أزمان .. بقيت انزل ازور سيدى حسن
زى ما كان سيدى محمد بيعمل كنت باخد لهم الفطير المشلتت والقشطة .. ودخلت الجامعه فى ام الدنيا ..
وكل مرة كنت بزور سيدى حسن كنت بلاقى الحال بيتبدل
يوم بعد يوم .. عشت عمرى كلة أدور على أم الدنيا فى الشوارع والموصلات الزحمة .. و .... و .... و....
ما لاقتهاش ... شفت حاجات كتير ...كتير مش من دينا ولا اخلاقنا ...قالولى ممكن تشوفيها على شط النيل ..
رحت جبت كوز درة وقعت ادور .. لقيت النيل مليان
مخلفات شفت حاجات كتير ما انكرش انى فتحت بقى وبرقت عنيا اما شفت الحبيبة واللى بيسووه على الكورنيش قلة حيا ...يووووه حتى كوز الدرة ماسخ مش زى زرع أرضنا ... انا بيتهيألى انا لمحت أم الدنيا عندنا فى بلدنا الصغيرة فى غيط القمح والدرة وتحت تكعيبة العنب
تحت التوته وشجرة الخوخ على الكوم واحنا بناكل درة مقلى وبنتغدى جبنة قديمة وجعضيض من قلب البرسيم وفحلين بصى وشاى من بتاع الركية و قلة المايه الصقعة من الطرنبه ميه نظيفة..
نزلت بعد الزمن بزمان زي عادتى ادور على ام الدنيا مريت علي النيل لاقيتنى واقفة بكلمة .. كان فيه ناس كتير زيي بيكلموه بردوا ..قلت له متسبناش ... أحنا عايشين على امل ان ام الدنيا ترجع لنا ...
لو مشيت خد أروحنا معاك ... خد أروحنا معاك ..
مصر ام الدنيا طول ما انت فيها ... انا دالوقت بس عرفت
انها ام الدنيا ..وهى فى حضنك هتفضل ام الدنيا ...
هتفضل ام الدنيا ....