صمتي والسكات
ماتستغربيش من الصمت والسكات
ولا تقولي خلاص ده سلم الرايات
انا صالب عودي وما اتهزتش
اصل جرحك عادي مابيموتش
تفرق ايه رصاصه عن الف
بعد الاولي القلب مات
محسش بعدها باللي عدي وفات
ياما دقت عالرأس طبول
وسيبت اللي يقول يقول
اسألي عني اللي عرفوني من سنين
هايقولولك
تشكيله غريبه مش زينا ميه وطين
وسط الزحمه وحداني
في وحدته عالم وكون تاني
فما تتغريش وتقولي سايبه فيا علامات
كنت حلقه من بين كتير حلقات
وجودك جوايا كان بقلم رصاص
انام واصحي ناسيه من الاساس
ممكن تلاقي نفسك بحبة ذكريات
كام صورة وضحكه حلوه
كلمه ولا رقصتنا علي لحن غنوه
والحلم اللي منك اتبرأ. اتعري
في الخلا بات
قالوها زمان
ان راح الحيا زاد علينا البلا
وانتي كبرياءك غطي عيونك
ماشوفتيش
غير صورة لنفسك منفوشة الريش
علقتي رأسك بنجوم السما
اتهيألك ذلتيني وقلبي ليكي اتحني
اصلك معذورة وماتعرفيش
قلبي قطر ماشي وقضبانه بنات
فماتستغربيش
من الصمت والسكات
ولا تقولي
خلاص سلمت رفعت الرايات
كلمات/محمد احمد مندور
