إنتى عيزة منى إيه
راكنة همومك ع الرفوف
قل ده وبنقول ظروف
عاكسه ف مدارك..الزمن
خدتى على ضرب الكفوف
مليانه قوه..ف قلب خوف
و محضره لياالكفن
ومهما بتقابلك ظروف
الاقيكى تجرى وتهربى
و بتستخبى ف الحروف
برغم ضيقتك..محنتك
رغم المرارة ف شكوتك
باشوف ف صمتك..قوتك
وف قلب ضعفك...قسوتك
راسمه طريقك...سكتك
لما الطريق يكون خطير
ايه مثبت خطوتك....؟
عاصره المرار..عصر العنب
شايفه كتير ...شوف العجب
دافنه دموعك فى الكتب
ولاتنحنيش ....رغم العذاب
رغم البعاد .... رغم الغياب
عمرك مافكرتى ف عتاب
ولايوم سألتى الدنيا...ليه؟
ناسيه انى منك...ولا ايه..؟
قويه فعلا ....
ولا انتى غاويه تظهرى
جامدة...ما يوم تتأثرى
مرعوبه م الليل...والضلام..!!!!
متكفنه جوه الالام...!!!!
نسيتى نفسك كل معنى ف الكلام
ناسيتى نفسك يعنى ايه
كلمه محبه او سلام
طب والحنين...؟.!!!!
اللى ساكن بين ضلوعك من سنين ؟!!!!...
مانعة نفسك م الانين؟!!!!!
مانعه صراخك....تسمعيه؟
خايفه ليه ...؟
ياللا اصرخى ... وماتسكتيش.
ليه خايفه انك
لو ف مره مشيتى سكه
تتوهى فيها..ماترجعيش....؟
خايفه حد يجى مره و يسألك...
انتى مين ...وماتعرفيش...؟!!!!!
مطحون عظامك جوه دايره
فوقى بقا....خليكى ثايره
صابره ليه ...ماتصبريش....
دا برغم انك للعيون مغمضه
و مابتشوفيش....
متعوده ع المضمضه
لو تعطشى ...مابتشربيش...
وعشان كده ...وبرغم خوفك
رغم المك او ظروفك
رغم المرارة جوا جوفك
رغم اللى فيكى واللى عندك ..
اللى باقى فيكى بس ....
هو عِنْدك