**
باعتلك يا جحا إعتذار
وحُمارك يسمع حكايتي
يمكن يكون لي إعتبار
ويقدر يرجع كرامتي
يا جحا غُلب حماري
زهقان يا خلق يا هوه
مراتي سبب مراري
لسان م الشق جابوه
الفجر تلحن لصوتها
وتشتم قصادي بنتها
الضهر تلعن حياتها
وتندب يوماتي حظها
يا ست وطي الصوت
كفايه زعيق ومشاكل
يجيلك ياخويا الموت
صوتى رقيق يا راجل
العصر يأدن عليتا
بتحكي ف التليفون
قاعده بنت اللزينا
تشكي لمين مايكون
نصيبي طين وهباب
مكتوب اعيش محرومه
مايدقش علينا الباب
غير وصل دين لحكومه
إخواتي جوازهم نقاوه
ليلاتي يجيلهم دليفري
وجوزي عليه الغباوه
خلا الحمار منه يجري
قالت لي روح السوق
شايل معاك القفص
هات من هناك برقوق
ويلك لو وزنه نقص
وتاخد معاك الشبك
فاتح هناك سماك
بالواحده تنقي السمك
صابح مالوهش وراك
بالمره هات لي فراخ
وكبدتها تكون فيها
تتبلها وف االاسياخ
وعلي الفحم تشويها
معروف هناك خُضري
تكشف علي الجرجير
مقطوف وراور بدري
تخطف شوال وتطير
ع الناصيه فيه بقال
غشاش ميزانه قليل
فيه حد بعده شمال
بكاش لسانه جميل
ف الصف قال عطار
كداب بتاع مشاهير
ع الرف شال أسرار
نصاب وباع تخدير
داهيه لتنسي العيش
إوعاك تجيبه ملسوع
عوزاه سُخن ويعيش
بلهيبه لكام اسبوع
يمشي النهار ويروح
واليوم علي ده الحال
يجي الغروب مجروح
والنوم ف ليلنا مُحال
مزق جُحا الطرطور
وشال حُماره وطار
نهق الحُمار مشكور
يامغفل فاكره هزار
اخلط راسين كبريت
ببخور ومترين جاز
سلط عليها عفاريت
ومين يقول يا جواز ؟
**
السبت 15 أغسطس 2020م
سمير ابراهيم زيان
ردآ علي قصيدة الشاعر المبدع / عبد الرحيم علي ( مسمار جحا )