- {رسالة دكتوراه }
بسم الله توكلنا على الله
تم بفضل وكرم الله
الذي لا نعبد الا اياه
مناقشه رساله الدكتوراه
رساله دكتوراه
بعد تردد والف محاوله
بعد مناقشه وبعد مداوله
من دكاتره كبيره عتاوله
وافقوا عليها بحمد الله
رساله دكتوراه
لما نويت ابدا بسلامه
قالوا ايه اسم الرساله
قلت هلاقي الف ملامه
اسم رسالتي معنى الاه
رساله دكتوراه
اه يقولها صاحبها بخنقه
اه واتقالت وقت الفرقه
اه ومعها الفين حرقه
قالها صاحبها للى نساه
رساله دكتوراه
اه واتقالت كدا بوضوح
واللي قالها جريح مدبوح
قالها وكل ما فيه مجروح
حتى مش عارف دواه
رساله دكتوراه
للى شاري ما كانش بايع
واللي كان اخلاص شايع
للي تايه واللى ضايع
كان حبيبه في يوم معاه
رساله دكتوراه
اه لك كبير في السن
واللي يوماتى كده بيئن
ولا حتى ولاده بتحن
كل الدنيا مش حاساه
رساله دكتوراه
للي بيعافر في زاده
اللى حظه زاد عناده
كل همه قوت ولاده
وكل لحظه زاد اساه
رساله الدكتوراه
اه برنامج بقى في اليوم
اه ومعاها مليون لوم
للي ليلاتى يبات مظلوم
واللي ظلموه الجناه
رساله دكتوراه
اه وقالها يوم مريض
لما شاف نفسه وحيد
شاب معاها يدوب وليد
حتى مش عارف دواه
رساله دكتوراه
اه واه بالف معنى
عن رحيل عزيز وجعنا
حزن ساكن و فى دموعنا
لما فارق الحياه
رساله دكتوراه
واخيرا الكل اقر واعترف
ما في حد فيهم اختلف
امتياز مع مرتبه الشرف
رساله دكتوراه في الاه
كلمات
محمد السيد سالم