راضِع تَلج
========
القطن إيه لو ما اتغَزَلش قماش !!
نُطفة صبى .. راحت ..
لا كان .. ولا عاش .
لو كنتى وقت الجَد ب تغشّى
أنا قلبى لمَّا يحب مش غشاش
وَلَّى زمان الدمع ف الأفراح
أو فوق كتاف ب نحبهم .. نرتاح
فيه دم .. نازل من عيون تمساح .
وانا لسّه غالى ودمعتى غاليه
الجَنّه فى الإمكان ..
ماهيش عاليه .
هُمّا البَشَر بس اللى بيوطّوا !!
ب يدوروا شهر .. ويرفضوا يخَطّوا
فوق القَنايَه .. ويشوفوها محيط !!
وكل فاشل فاكر انُّه حويط !!
ينفد ب جِلدُه .. الفَرح ح يجيلُه !!
يرمى بياضُه ل خوف .. ويديلُه !!
ميراث ندالتُه .. وضحكة الأولاد !!
يجمع بواقى من رضا الأوغاد
من غير مقابل .. ينحنى .. ويخضع
ومن صلاتُه .. ب يكتفى يركع
من غير سجود ..
هوَّ اتوَلَد ساجد .
الدنيا نار ..
بس البعيد .. بارد .
كإنه قبل فطامُه راضِع تلج
بذرِة مَهانَه .. تخُر خوف ف الحَلج
يسجد لألف اللاتِ والعُزَّى
ميت .. وواقف برضو يتعزَى
يقبل عزاه من ميتين زيُّه
ب يكبّروا ف جنازتُه ويحيُّوا
كل الأيادي اللى عليها الدم
وكل مِن حَمِّل فوقيهم هَم
وماقالشى إمشوا ..
قال يادوبك حَا .
الحِمل يخلص ناخُد إللى وراه
باصمين مُقَدَم صَك بالطاعه
إتشال وعَفِّن جوّه بلّاعه
مش باقى منّه غير شعور بالقرف
يحس بيه المُتخَمين بالتَرف
وساعات يخشّوا ب سببُه فى الإنعاش
تفضل ياقطن ماتتغزلش قماش
وتفضلى ف الجَد ب تغشّى
وانا قلبى .. إبن الكلب .. مش غشاش .