***
من كلمات
الطبيب الشاعر المصرى/ د.محمد رزق
***
الأبِّ حُــبِّ ومدرَسَـــة فيها العَــــلام ،
فيها الأدب فيها الـشـموخ فيها السلام ،
فيها الإرادة والعَـمَـل فيها الـوئـام ،
فيها الحَـنان والـطـَّبـطَـبَة وفيها الـمَـلام .
*
الأبِّ يِـقـسَى بَـسِّ قـلـبُه بـيِندِبِـح م الخوف عليك ،
الأبِّ يِـســنِد خَطوتَـك بالحُـبِّ وبيحـضُـن إيـديك ،
الأبِّ خاضِ الـتـَّجـرِبَة ، والمَعـرِفـَة بيوهِبها ليك ،
الأبِّ بـيبـيع دُنـيِـتُـه مِن غِـير تَـمَن وبـيِـشـتِـريك .
*
الأبِّ يا بنى لو تِـخـونـُه يـحـضُـنَـك ويـعَـلـِّـمَك ،
الأبِّ فاهِــم واســــألـُه عـن أىِّ حاجَـة يـفَـهِّـمَك ،
الأبِّ لـو ضاق الـطريق يِـسـنِد خُطاك ويـقَـدِّمَك ،
الأبِّ مُمكِـن يِـتحِـرِم ، لـَكِـنـُّه عُـمرُه ما يِـحرِمَك .
*
الأبِّ رايَـة م الـبِـدايَـة وانـتَ نــورُه ودُنـيِـتـُـه ،
الأبِّ تايـه فى الحِـكايَـة بَـسِّ عارِف سِــكـِّـتُـه ،
صابِـر بِـيِـبنى دُنـيِـتَـك مهما المَصَاعِـب قابـلِتـُه ،
الأبِّ مَهـما يكون عَـلـيل بِـيـدارِى عَـنـَّـك عِـلـِّـتـُه .
*
الأبِّ قَـلـبُه مِش بِـيِـعـرَف يِـنـتِـقِـم ، بِـيـقـول سَـماح ،
يِحبِـس دموعُه ويِـنجِـرِح ، ويـداوِى قَـلـبَك م الجِـراح ،
الأبِّ كِـلـمِة رَبـِّـنا بالحَـقِّ ( حَـى عـلى الفلاح ) ،
الأبِّ بِـيعـيـش فى الضَّلام يحلـم بنورَك فى الصَّباح .
*
الأبِّ يِـحـزَن لـو يـشــوفَـك عَـن طَريقَـك تِـنحِـرِف ،
ويـفَـهِّـمَك إيـه الغَـلَـط ، ويـثـور عَليك لو تِـنجِـرِف ،
خايـف عَـليك وبـيِـمـنَعَـك ، وبـفَـضـلـُه لازم تِـعـتِـرِف ،
لـو كان يـسـيـبَـك فى المَـتاهَـة كان مَـصـيرَك يِـخـتِـلِـف .
*
الأبِّ يحكيـلـَـك حَـكاوِى عن حياتُه بالأمانَـة لـَجـلِ خايـف يوم تِـتوه ،
فيها الخَطايا والغـَلـَط ، فيها الدِّموع فيها الـوَجَع فيها اللى صانوا أو خانوه
فيها الـتـَّجارِب كـُـلـَّها ، فيها الأمل ، بـِيكَبَّـرَك ويعَـلـِّـمَك تِـقـرا الوجـوه ،
بِـتحاسبُه ليه ع اللى حَصَل واللى حَكَى ؟ هـوَّ انـتَ كـُـنت ف يـوم أبوه ؟!
***
من ديوان / عـصــــر الـمـــــوت
للطبيب الشاعر/ د.محمد رزق
***
أهديها إلى أولادى وإلى كل شباب هذا الجيل ، مع خالص محبتى لأهلى وصحبتى .
الطبيب الشاعر/ د.محمد رزق
***