صعلوك
=======
الدنيا بتاعتى مادام ع الارض بَدِب وافوت
وب اجيب اللقمه ف غمضة عين من بوق الحوت
وعشان ماب افضفض ب اللى ف قلبى ب علو الصوت
الكل حاسدنى .. من الشهبندر .. للمملوك
........ صعلوك
متكيّف قوى م العيشه بعيد .. خلف الرَصَّه
واجدع بزمان من 100 سلطان .. قول واتوصَّى
فاهم بالفطره لا ب استفهِم ولا ب اتقصَّى
أفعل مابدالى ولو سألوك ح تقول
.......... صعلوك
وانا عمرى ماكنت من البهوات أصحاب الكرش
دايما غلبان م اللى بيتباعوا الشيله بقرش
والكل عارفنى مقاوح جدا وماب انكرش
إنى ماباقبلش لثانيه اعيش واموت مسكوك
........... صعلوك
وعشان متأكد إنى ب اعيش فى تاريخ مشطوب
والدنيا بحالها ب تتغير حسب المطلوب
أوقات تلاقينى ف قلب جراح الخلق ب ادوب
وساعات أستأسِد فى معارك فَشر اليرموك
.......... صعلوك
ب جراءه ب اهيَّص وب افهيَّص جوَّه الأحزان
فيه إيه يستاهل أتعكَّر وأبات قرفان
بلد المتغطّى ب أسيادها .. حتما عريان
حكمه صغيوره .. وما فهمهاشى ابويا وابوك
صعلوك ....... صعلوك .......... صعلوك .