حَليب رايب
============
حمارتَك العَرجَه خَطَفها لئيم
والدنيا محتاجه لقرار ترميم
فيه قاضى آيل للسقوط عايزَك
إجهَز ..
ح تتمرمط .. ف سين .. وف جيم !!
الشمس بارده ..
والبرود حامى .
ماتهربيش ياحبيبتى .. وتنامى
أنتى إتهام ..
ودليل على أدانتى .
وانتى القفص والسجّانين .. وانتى
كل الشهود ..
ف النفى والإثبات .
ومذكّرات الجلسه والطلبات
والحاجب الأعمى ..
وأمين السر .
وكل مايخلّى البرئ ب يقر
وانتى الدُفوع ..
والمدفوعين الأجر .
إللى بأمرك جم زارونى الفجر
وخوّفوه من طَلّته ف شيشك
لا قرص شمس يكون رغيف عيشك
ولا ضى يبقى ف بسمتك دايب
لازم حليبك يتحلب .. رايب !!
دوا ل حموضة معده مفتوحه
شَغَّالَه عِز ماهيَّا مجروحه
من عُسر هضم حبيبك الخايب .
الإعتراف .. عبد الشعور بالألم
لحظة مايتساوى الوجود بالعدم
تحِسى موت ..
أو موت ما يتحسش .
لا العين تبُص .. ولا الجفون ترمِش
وانا جفنى فوقه حجاره .. ومحَفَّه
وميزانَه فاجره .. عديمة الكَفَّه
وقت الحساب تهرب .. وتتخفّى
تطب بعد الناس ماتتوفَّى
وتبقى مش محتاجه كشف حساب
كشف ب أسامى معلّقاه ع الباب
مكتوب عليه المجد للمجانين
من قبل ( مينا ) ل حَد يوم الدين
غدا .. وعشا .. وفطار .. وبالمجان !!
مَطرَح مايِسرِى يمرى ع اللى خان !!
ووزَّعِك .. ب الجُمله .. والكيلو
حَط ف خزاينُه قد مايشيلوا
وادّى اللى فايض منحه .. للأعداء !!
وفوقها .. خوف .. وولاء
ولمّنا ف الفصل .. بقا ناظر
وادَّى لنا .. أكبر درس ف الأخلاق !!