قالتلي من الغربه كفياك
الجسم بهدله المرض
نفسي اشوفك والقاك
البيت واسع علينا
والأكل مسخ بلاك
تعالي يا ضناي وحشني
نفسي يا ولدي اشيل ضناك
العمر بيجري كيف الساقيه
وهقولهالك يا ولدي كفياك
ارجع يا ولدي وهتلك عيل
تلاقي يا ولدي شعرك شاب
محدش بينام من غير عشا
ورب هنا هو رب هناك
كل مره تقولي البيت والمصاريف
ولما يروح العمر مهينفعك باب ولا شباك
ياما ناس تغربوا قبلك
ودلوقتي ادفنوا تحت التراب
مخدوش منها حاجه
ولما فكر يجي سنتين بعدها مات
نفسي اشوف ولدك في حجري
الدنيا متحلاش غير بالأولاد
والله يامه انا تعبان
الكل بيقول ابعت وهات
ايش ملابس وايش فلوس
وايش فساتين وتليفونات
ونقول بكره تتعدل
شكلها مش هتتعدل للممات
ولما تروح ايدك فاضيه
أبوك مستنيك يقول هات
ولما تقول مجبتش حاجه
بيقول ياما جاب لأمه الغراب
الحمد لله على كل حال
هو مسبب الأسباب
لو رايد لي خلفه يامه
هتيجي من اقل الأسباب
بنعمل اللي نقدر عليه
والباقي على رب الأرباب
كفياكي يامه قلبتي مواجعي
حسيت القلب اتشرخ ومات
حاسه بيك يا ولدي
وبدعيلك في كل الاوقات
واديني اتجوزت تاني يامه
واهو ربك اراد
وادعي ربنا يكمل فرحتي
ويجعله من حاملين الكتاب
شاعر العاميه
ادهم حازم السمهودي