..............
لما أكون عاوزك لوحدي
ما تقوليش عني
اناني
ولما أعيش الصبر
وحدي
وأملا من دمعي
الأناني...
لما خدك ينسى خدي
و الشفايف في
ثواني
تيجي تشهد صب وردي
جوه بستان
م الأماني...
عندها
انا مش هقولك لأ كفايه
خلصت البسمه
بشفايا
أو أقولك مش معايا
وتبوسيني برده
تاني
.........
لما أحس بسحر حضنك
يملا قلبي بالحنين
بعدها من همسه منك
تفرح القلب الحزين
أو عصير الشهد يروي
حلقي جف من الأنين
بسمه واحده
تكون كفايه
غمزه من عينك
دوايه
ضحكه فيها
تمام شفايا
أنسي أصلا
أسمي مين
.....؟
لما أغيب واسكر ساعتها
أوعي لحظه تفوقيني
نامي جنبي واشربي
نفس كاسك دوقيني
واسقي تاني .. ايوه تاني
وإقربي ..
هاتي رمشك
واجرحيني وإضربي
وأما سهمك يطعن الصدر بقساوته
هاتي غيرتك مزقيني
افتحي قلبي اللي حبك
وأساليه... لأ فتشيه
لو بيعشق حد غيرك
موتيه
وان سبت لك مش بريء .
صبي دمعك واحرقيه
هاتي آهاتك تشعلله جداره
سيبي نارك
تحرق الشوق ومراره.
هِدِّي داره..
وان لقيتي ان عشقك كان قراره.
يبق لازم ترحميه
أرحميه يا ضي عيني.
وامنحي لنفسك برائتك واسكنيني
وإرقدي
جوه الضمير، و ونسيني
واشربي من قلبي عشق
و شربيني
وأوعدك لو دقتي قطره
م إشتياقي والحنين
تنسي أصلا
انتي مين
................
حسن حفني