- الدنيا زحمة .. و .. دربكة -
يا أنتكا ،، يا أنتكا !
- الدنيا مدح .. و .. سهوكة -
مأمور وأمروا سيده يقتل ضى نور
نفذ بسيف الكف على عين الحضور
كل الخلايق واقفة تقدر يوم تثور
- م الخوف قلوبها بتترعش ،، و مفككة !
مجروح ف ريح الشوق يفوق ،، يطلع لفوق
ينزل يكمل ف الوجع ،، م الويل يدوق
ومفيش ف أوجاع الوحيد بالليل حقوق
- غير دمع نازل يشتكى وقت البكا !
الخلق سبقت للغنى بالإنحياز
تنحاز تشوف كل البدع ف الإنتهاز
ومفيش جواز من غير قبول ،، وقت الحماس
- صوت الأزاز لما أنكسر كان تكتاكا !
ناس قبلنا ماتوا وخلاص سر أندفن
مانعيش ياسادة بالسعادة ،، بدون شجن
كل البنات ف الحب للشاطر حسن
- هو اللى ساكن عقلهم عنه إتحكى !
الناس نوعين فيهم بجح .. و .. اللى إختشى
ناس فقرا نايمة على الرصيف متنعكشة
وناس بجاه ،، ف قصور بمال متحبشة
- عايشين ف رقص وفرفشة ،، بالهشتاكا !
ناس مالها زى جبال وبتنام ع القطيف
وناس فقيرة إتمنت الحاف .. و .. الرغيف
شاف الفلان المقتدر فقر الضعيف
- حجب الفلوس عن إيده .. و .. إتمنع الذكا !
قالوا زمان كلام وكان ياللعجب
مين فينا داس بعد الغياب ريحة العتب ؟؟
غير لما صدق وقفته بعد السبب
- من كل جرح ف غربته لأمه إشتكى !
- يا أنتكا يا أنتكا .. الدنيا زحمة و دربكة -
- يا أنتكا يا أنتكا .. الدنيا مدح و سهوكة -
#دربكة ،،
#بقلمى_هانى_السيد ،،،
17_11_2018