ماتستغربيش من صمتي والسكات
ولا تقولي خلاص سلمت ورفعت الرايات
انا صالب عودي وما اتهزيتش
اصل جرحك عادي مابيموتش
تفرق ايه رصاصه عن الف
بعد الاولي خلاص مات
ماحسش بعدها باللي عدي وفات
ياما دقت عالرأس طبول
وسيبت اللي يقول يقول
اسالي عني اللي عرفوني من سنين
هايقولك
عجينه غريبه مش زينا ميه وطين
وسط الزحمه وحداني
وفي وحدته عالم وكون تاني
فماتتغريش وتقولي سايبه فيا علامات
يادوب كنتي حلقه من كتير حلقات
وجودك جوايا اصله بقلم رصاص
انام واصحي ناسيه من الاساس
ممكن تلاقي نفسك في شوية ذكريات
كام صورة بضحكه حلوه
اوكلمه ولا رقصه بلحن غنوه
او بالحلم اللي منك اتبرأ اتعري
بالخلا. بات
قالوها زمان
ان راح الحيا
زاد علينا البلا
انت كبرياءك غطي عيونك ماشوفتيش
غير صورة لنفسك منفوشة الريش
علقتي رأسك بنجوم السما
اتهيألك ذلتيني والقلب ليكي اتحني
اصلك معذورة وماتعرفيش
ان قلبي قطر ماشي قضبانه بنات
فماتستغربيش من صمتي والسكات
ولا تفكري اني سلمت ورفعتلك الرايات
