دمعة وطن
على ابن واقف يحرسه
ساعة المحن
واقف يكبّر على الحدود
والكل نايم فى البيوت
مش مهم إزاى يموت
راضى بحياته تكون تمن
وأمه بتدعيله فى ثبات
فاكراله كل الذكريـــات
جالها الخبر الوحش مات
وقفت تزغرد للزمن
يا مية خسارة على البطل
ضحى بحياته ومات أسد
كان كل همه يعيش وطن
ويمـــــــــوت فداءً للبلد
الفين سلام لابنى الهمام
اللى ما فكّـــــر يوم ينام
واقف على الجبهة تمام
ابنى يا ناس شكله اتحسد
أخر كلام قاله الشهيد
يا أمّا هأموت عنك بعيد
قولتله يا ابنى بلاش حديت
قُولك بيوجع يا ولـــــد
سألت عروستك من يومين
يا أمايا ودوا عريسى فين
الحنة لسه مخضرة فى إيدى اليمين
لسه ما كملناش كلام دخل الجسد
شايلينه فوق منه العلم
والدم سايل على الكفن
والأرض قايمة تحضنه
هاتوا الشهيد
اللى بجنة ربنا يومها اتوعد
مات الأسد
الله يعينك يا بلد
الشاعر / ناصر عبد المقصود