ليه يادنيا انتي كده علي طول معندانه
وللعذاب والفراق والهجر والخصام وخدانه
بتبعدينا عن الحبايب وسيبانا عطشانه
المسافات بين الاخوه والإخوات بتزيد
وبعد الاب والام عن بعض صبحوا بعيد
ناسيين كل حاجه كانت زمان بينهم حلوه
الانانيه والمصلحه صبحت اهم من الأخوه
ليه يادنيا مفرقانه ومعذبانه بالشكل ده
والحب اللي كان من طمع النفوس إتغير ليه كده
الاب بيسيب وراه علشان من بعده يسترهم
وانتي يادنيا خليتي طمعهم. يبعدهم
يخسارة العشره والمحبه اللي كانت بينهم
والحزن والفرح اللي كان زمان لاممهم
ودي الوقتي يادنيا لافرح ولاحزن مقربهم
دنيا غداره ونفوس ناسها مكاره
ضميرهم مات وواخدينك يادنيا شطاره
وغاب الوفا بين الاحباب وراح. الأخلاص
والضمير مبقاش له وجود والاخلاق خلاص
والرضا بالنصيب مات في قلوب الناس
والابن لأمه وابوه انعدم فيه الاحساس
وبقيتي يادنيا زي السواقي الدواره
والكل فيكي صبحوا عايشين حياره
الناس فاهمينك يادنيا ليه غلط
وحياتهم صبحت مليانه رغي و لغط
وانتي يادنيا يوم فرح وأيام صراخ وعيط
ياريت الكل يفهم يادنيا لافرح ولا جرح بيدوم
النسيان هيداوي الجراح بس نبطل لبعض نلوم
لو الحب عرف طريقنا بصحيح ورضينا بالمقسوم
الصاحب هيبقي صاحب والحبيب عمره ماراح يخون
وهنلاقيكي يادنيا في عيونا نور
والصحرا شوفناها بستان بعد ماكانت بور
ونحس بالافراح ونشارك بعضنا
ونداوي جراحنا ونلاقي اللي يمسح دمعنا
والزهور هتفتح والطيور هتغني ونحب بعض كلنا
والخير يملا قلوبنا ونرضي بنصيبنا وننسي حزننا
خواطر ( أشرف الدغيدي )
حقوق الملكية محفوظه