.
.
كان عَندي غَسيل ياما مِتكوم
أنا قولت أقوم واخد فُومين
وأصفي الرُّز المِتعوم
وأحُط عيار يطعم فَمين
أصل انا بصراحة راجل عصري
بتعامل بثقافتي وحصري
مع إني من الشَّعب المَصري
لا يهمني فين ولا تطلع مين
شغلت الغَسالة الإيديال
وحطيت جواها كيسين إيريال
ونويت ع الغَسلة الإسبيشيال
مع إن قالولي أجيب برسيل
ومِن بَعد غَسيلي م يتنضف
راح ازهر قبل ما يتشطف
والنُّور بصراحة أهو اتعطف
نَور لي السِّكة فى عِز اللّيل
وحَروح السُّوق أختار وأدوق
وحنقي الفِلفل والبَرقوق
وحجيب السَّايل والمَسحوق
ولا عُمري أحتاج حَد يْشيل
راح ابيع البايظ مِ الكَراكيب
وحَركب لَو مِحتاج تْركيب
حَنضف سقفي مِن العَناكيب
وحدقق طبعاً فى التّفاصيل
ف عَمايل الفَتة انا لهلوبة
بمشي ع الوَصفة المَكتوبة
لو حتىَ راح اوصل للنّوبة
وبيقولوا عليَّ بالي طويل
أنا أصل دماغي مستتها
وبراعي دايما حلاوتها
أفكاري عُمري ما اشتتها
وبقول والله الصَّبر جَميل
ولا عُمري بعمل سي السّٕيد
ولا فكري كان يوم متقيد
مع إني ف النّوتة بأيّد
وبساعد إللي عليَّ يْمِيّل
أنا بَنشُر دايما بإرادتي
ولا عُمرى للحَرف بْوَطي
وبيعرفوا حالتي مِن خَطي
ومبادئي ما بْتِعرَف تَحويل
الصُّحبة الحِلوة بتتقدر
عُمرها للهايفة ما تتصدر
دايماً بالمِسك بتتعطر
وبتوري ابو فِكر مَريض الوَيل
ف حَقدر إللي يقدرني
واستبعد إللى يحيرني
ولو حد ف مَرة جه زارنى
راح ارحب طبعاً بالتَّهليل
مُش حَعمل tag لأى friend
ولا حبعت للى سايقها ف عِند
أنا حكتب على صداقتهم end
وحَلملم ذاتي وأنوي رَحيل
أنا بنشر طبعاً يا جماعة
وانا حاطط جَنبي الوَٕلاعة
راح ازود ف الفِكر مَناعة
وحولع إللي ف فِكره عَليل
ف نهاية القول اختار صاحبك
إللي ف كلامه بينصحبك
ولو يجي لمصلحته يصاحبك
إعمله delete وارميه ف النِّيل
*
*
#مدحت_يوسف