دي من بلاستك وعيدان غاب
فيها حلم العيال اتفتحلو الف باب
اصل الفراغ زاد حبتين
مدارس وحضانات مقفوله
وفي البيوت محبوسين
واللعب ممنوع والزعل مرفوع
وكعادتنا كمصرين في الازمه مخترعين
ايديهم بيها لامسه السما
وفي عنيهم بيغني غرور الانا
طيارتي هي الاعلي وصلت للنجوم
لا دي بتاعتي وده مكانها كل يوم
هوي الخيط شويه لا ده هتنزل
طب شد كمان حبه واوعي ايدل تتزلزل
ابعد عن الكهربا والسلوك
اه لو لحظه مسكوك
هنقطع الخيط ويبدا الواد بالبكا والتنطيط
هاني عماد احمد تعالو نروح بعيد
نطير في الغيطان مفيش سلوك
والفضا واسع وسعيد
وكمان الهوا هناك اوي وشديد
بس خلاص الحلم راح
وطارت لاخر مرة بفعل الرياح
ورجع الواد حزين مكسور
كانه سقط في الثانويه
او سايب البيت من غير زاد ولا ميه
خايف يطلب مني واحده تانيه
عرضت عليه وقولتله فداك ياعنيا
وجاب طيارة جديده
ونام عشان م الصبح بدري
يبدأ رحلته للسما البعيده