العِشق المَلَكى
==========
أنا زى خوفو ..
مجهِّز الموتَه .
هوّا الهرم .. وانا ورقه على توته
أنا زيُّه برضو ف الطفوله .. حَبِيت
وف المراهقه ..
عَشَقْت بَنّوتَه .
لكن .. لإنه كان برتبة رب
من حقه من كل البنات يتحب
ويخش عافيه ف كل أحلامهم
ويبقى مالك حتى أوهامهم
دفا المشاعر .. أو دفا البوسه
محروس ..
مافيش قدَّامه محروسه .
كل الضفاير طايره .. منُّه .. إليه
كل القدود .. ماتشوفها إلا عنيه
وانا بس ليَّا اللى ماتعجبهوش
أبقا بَطل ف غرامها ..
بس فاشوش .
أكون سعيد .. لو تفتكرنى رموش
تحدف لى حتة نَظره ع الطاير
تقول لى صَدَقَه .. لقلبك الباير
تكفى الإلَه الشر .. من عينَك
فين الإله .. وانت ياشئ فينك
العشق مَلَكى .. ماينولوش مملوك
تكفيك طروف النظره .. ياصعلوك
تتعشَّا بيها .. وتكتفى .. وتشبع
وتقول ياريت وقت الفطار ترجع
ولو ما جيتشى .. إبقَى إنوى الصوم .
وخوفو مات ..
أنا مُت من خوفى .
عَرقان فًزَع .. من راسى ل طروفى
من بعد موته مين إله يتحَب ؟
ومين يسبَّح لُه العبيد .. والحَب ؟
إزّاى نشيل لُه حجارة الدنيا
ونعمل الأعاجيب .. وهوّا يموت !!
ويعيش حقير زيّى ..
بورقة توت !!! .