كاره في اجابتك انا كويسه
شايف حروفها بالاه متغمسه
لما اسالك فضي عليا اتكلمي
احكي وبلاش واحدك تتألمي
ايه فايدة صديق في حبيب
وقت الوجع يبعد مايكونش قريب
يمكن تكوني بخير بس روحي
عليكي موسوسه
افرشيلي جوه وجعك مكان
غطيني وياكي بالالم هاكون فرحان
مش غاوي نكد ولا بأنبش في الاحزان
انا بس خايف علي قلبك الاخضر الدبلان
انا كويسه بتخليني قلقان كلمه دماغي
عليها متربسه
ابتسامة شفايفك مرسومه
ومن تحتها الروچ بيصرخ مظلومه
لون ضحكتك شايفه باهت
والورود بخدودك لاطرحت ولا بانت
حتي لمعة العين مخنوقه مش متنفسه
انا كويسه كلمه ليا مش مهضومه
شايف في نطقها صرخه مكتومه
ويا انين روح نبتتها عطشانه محرومه
ده انا باشوفك بنبض قلب ام مكلومه
فاتكلمي وبلاش تقولي انا كويسه
بتوجعني اكتر. باشوف حروفها بالاهه متغمسه