امى رغم فراقها لسة حضورها باقى
عايشة جمبي ساكنة قلبي واشتياقى
تدعى ليا تخاف عليا رافضة تتقبل فراقى
كنت دنيتها وكانت ليا دنيا
واحشة قلبي ياللى كنتى عيون نبيلك
بحسب الايام تعدى ليوم مااجيلك
كنتى فجرى وكنت ليلك
غبتى عني ف دنيا تانية
قلبك الطيب دليلى
كنتي بدر بيضوى ليلى
عشتى رحمة بتطوي ويلى
بخوفك الدايم عليا
بعد صوتك لما غاب مابقيتش عارف
مين معايا ومين عليا وقلبي خايف
كنتى نور عينى وخلاص مابقيتش شايف
كان دفايا ف حضنك انتى وكنتى غالية
مين يجيب لبناتى يوم الفرح حنة
ضحكتك وسط الولاد في اللمة جنة
دعوتك وقت الاذان تكريم ومنة
فضل بينور حياتنا ف كل ثانية
يرحمك ربى وكمان يحسن اليكى
ياللى من عمرى الحزين غابت عنيكى
عند ربي قلبي مطمن عليكى
يكرمك بالجنة ويصبر قلوبنا
اسبقى عالجنة يااما مع السلامة
نلتقى في الجنة يااما يوم القيامة
ياللى عشتى بالكرم رمز الشهامة
الحياة افضل هناك والدنيا فانية
الحياة تبدأ هناك والآخرة باقية