لمين يا شاعر
تعظيم سلام ده لمين ياشاعر
للناس اللى بيراعوا المشاعر
للناس اللى بيجبروا الخواطر
للمسالم والمسامح وهو قادر
البشر اللي قلبها بالحب عامر
تعظيم سلام ده لمين يا شاعر
لليغفرخطأ الناس ولغيره عاذر
ايده ممدوده بالسلام دايمايبادر
تعظيم سلام ده لمين يا شاعر
للى راضى برزقه حامد وشاكر
راضى بالمقسوم له وهو صابر
تعظيم سلام ده لمين يا شاعر
للأمين العفيف الشريف الطاهر
اللى عيشته حلال قانع وشاكر
تعظيم سلام ده لمين ياشاعر
للحنين اللي قلبه بالرحمة عامر
للي يقول لوالديه نعم و حاضر
الرحيم بالاهل وبالغلابه شاعر
تعظيم سلام ده لمين يا شاعر
للكبير اللي بيترفع عن الصغاير
اللي ساعى للخير وبالعرف امر
المجامل فالحزن والفرح حاضر
اللى بيراعى الاصول للحق ناصر
تعظيم سلام ده لمين يا شاعر
لكل راعي راعي الرعيه وصابر
ماسك زمام امرها وعليها قادر
بالعدل حاكم رعيته للظلم ناكر
لواجباته ولحقوقها عارف وفاكر
تعظيم سلا م
لناس قامات ولهم فضل ومأثر
دول ناس لنا قدوة بيهم نفاخر
الشاعر /عبد المنعم حمدى رضوان