رجلية مش شايلاني
مالها دية
تكونشي حامل تاني
والله دي مجنناني .... يعني شايفني بتوجع ومش سائل
لا إزاي مالك يا عمري .... بس بظبط التليفزيون علي الحامل
وده وقته ... بقولك تعبانة ... ألف سلامة يا ست الكل يا غلبانة ....
هات الراضعة بتاعت الواد من التلاجة
بس كده من عنية .... الله دي فاضية
قومي بقي جهزيها لما أتوضا .....
نازل تصلي .... إن شاء الله وأدعي
طب هاتلي شمر وينسون .... وكراوية وليمون
وما تنساش تفوت ع البقال .... عم متقال
تجيب إزازة كلور
وف طريقك هاتلاقي الجزار
حتة لحمة كده حمرا مشفية .... وشوية عضم توصية
عشان الشوربة .... آه يانا ده أنا حاسس بغربة
نفسي في يوم راحة ... ست كده مرتاحة
تقعد جنبي تواسيني .... ومن الجراح تداويني
تعبان وشايل .... يا حظي المايل
بنات ولا في الأحلام .... رايحين جايين يا عيني ع الجمال ... أحمر وأخضر أشكال وألوان
الخدود تفاح والعيون غزلان ....
بتقول حاجة يا شعبان .... لا أبدا يا إمتثال
ده أنا بجهز الشوال ....
إللي فيه هاشتال ... طلبات البيت والعيال
يادي الحوسة ... نسيت أقولك ماتنساش الكوسة
ياريتني ما قعدت في الكوشة ...
كنت طايش ومستعجل ...
وعمال أتغزل .... وادي النتيجة .... داير في ساقية
والدنيا ولا هي شادية ولا حتي نادية ...
بقلم
محمد راشد