★★★★★★★★★★★★★★★★★★★
قالت أنت حبيبى وعامل
حاجه لقلبى الموجوع خف
ف لاقيت قلبى المحظوظ طايل
بهواك فرحه بتضرب دف
قمت أنا رادد وأنا بتمايل
قلبى أنا أكتر لكن عف
أنه بصده فيروح شايل
هم ف هم كتير اتسف
كل ده كله كان فى رسايل
جوه ماسنجر حتى الوصف
جانى ف صوره فقلت انا هايل
روح وجمال فضربت الكف
قلت لها امتى ح نتقابل
قالت حاضر بس أخف
رحت بسرعة وقوام سائل
ربى بفضله ينزل لطف
جابها المولى ربى جمايل
وبقت كالمكوك بتلف
ايشى ندوات ويا اجتماعات
وايشى معارض مع زيارات
وأجى اتكلم الاقى سلامات
وبشوق عالى امتى هنتزف
طيب وأنا هتزف ف صورة
إمتى نحس حرارة الدم
وأنتى يا قمرايه يا أموره
لازم يبقى عندك فهم
مش معنى إنى أحب الصورة
هفضل كده أنا ناعى الهم
ولا لعبة ف إيدك ولا كورة
ولا حتى مركون ع الرف
ألف سلامه يا ستى الحاسه
مش هتحمل ما هى مش ناقصه
ولا حتى هزود ع الرصه
نبع الصبر أنا جوايا جف
ألف سلامه يا قلب هويته
وحبيب لعيونى اتمنيته
وردى على التسويف حطيته
اسمهك عالخاص صابه الحذف
*****************************************
المصرى العربى الحر
الشاعر/محمد الشاذلى