احمد صبري
-
كل الفروع مالت
دبلانة ع الاخر
حتى عش اليمام
مهدود و مش قادر
وحمام سلام الامان
زعلان ومسافر
وقف الغراب ع التل
طلع الشيطان شاطر
-
مضحوك عليك وعليه
م الداني و الفاجر
الجوع لو يلبسك
هتصلي ع الكافر
والخوف لو شد ريح
مهما هتتعافر
يطلع وزنك خفيف
ورقة في دفاتر
-
تاخد دور ف الحياه
تسهر وبتذاكر
يطلع نصيبك وجع
ونسبة م التذاكر
تطلع طابور العيش
وتبقى مش ظاهر
تاخد حبة مفيش
بس اوعى تتظاهر
-
حد فاهم حاجة
حدش عنده مشاعر
حلم الجناين طرح
شاعرة وشاعر
واقفين وسط الطريق
لا نور ولا ساتر
البرد نهش المعاني
ف ليل ظلام غادر
-
ياشمس بكره اظهري
الحب شيء نادر
يمكن يصحي الورد
ببصلة ونشادر
فوقوا يا اهل الكهف
على ايه بنتناحر
لامتى زي النحل
هنلف في دواير