كرامتى خط أحمر
عيونى بريئة كات شايفاه
ملاك طاير من الجنة
فرح قلبى وقال الآه
خلاص هحب واتهنى
فاتت أيام ورا أيام
كلامه وفعله اتغير
وفوقت بسرعة م الأوهام
وقلبى حزين و متحير
أنا إنسانة إديته
كتير أوقات يعيد نفسه
وعمرى فى يوم ما خليته
من الأحزان حاجة تمسه
ليه ينكر ليه وفاء قلبى
ويحكى لديّه ولديّه
على أسرارنا ما يخبى
وليه جرح كده فيه
ليه قال عليه مغرورة
وشايلة كمان قوى فيها
ده أنا مجروحة مكسورة
ليه كسرة قلبى ناسيها
كرامتى خطها أحمر
تعدى عليه ده مش مسموح
وياما كتير من العشاق
على الواحدة بتيجى وتروح
كتير قالوا لى أرجعلك
وأنسى الماضى وأسامح
لقيت صعب إنى أسمعلك
ده ألمى سنين مش امبارح
أنا إنسانة طبيعية
وعقلى كبير قوى ومفتوح
وشايفة نفسى مثالية
ولا بندم واعيش بجروح
أنا نِفسى فى شخصية
اقول عنها لقيت نفسى
معاه أحزانى منسية
عاشق روحى فاهم همسى
بقلم : فاتن محمد رشاد
