الاعتصام
بيني وبين نفسي نويت الاعتصام
وانزل ستار الصمت وانهي مسرحية الكلام
لغيرك مالوش طعم ولاحتي في سلام
بنت قلبي البكر لمين تاني تتقال
اخر عنقود دقاته لغيرك محال
خلاص استقام خط نبضاته
عايش بكفنه جاهز لمماته
جفت شفايفي بقا يجرحها الابتسام
تاه بينهم اللقا وانفرض عليهم الخصام
هوانا خيط عنكبوت اتنسل
سراب ميه بصحرا اتمثل
لا بنوصله ونطفي للهوي حرمان
ولا بنفوق ونبطل في العشق السرحان
اصلي سكرت من كام سنه غرام
العقل فيهم غاب وعاش بالتوهان
هالم انيني في ليل السكون
بايدي اسلسل دمع العيون
وامنع خطوتي من سكتك
هاقتل حنيني واشتياقي للمستك
واشخبط ملامح وشك بشرياني
امحي لحظات اللقا بوجداني
أنفاسي حتي أنفاسي
اللي كانت بيكي مش عايزها
ويلا السلام
من غيرك هتعدي وتفوت الايام
اصلي خلاص قررت
بيني وبين نفسي نويت الاعتصام
وانزل ستار الصمت
وانهي مسرحية الكلام
كلماتي/محمد أحمد مندور
