اصدقائى الاحباء كلمة بالعامية بعنوان – رسالة تبكيت --
طالت قعدة البيت -------------- ومشيت مشيت و لفيت
بحور بالخيال عديت ------------ و نجوم السماء عديت
افتكرت ذكريات محيط ----------- و اتنطت زى العبيط
وكسرت ساعة الحيط --------- ماهو ايه لزمته التوقيت
-----------------------------------------------------------
تعلمت شغل البيت -------------- والتخليل تحت الزيت
كنست نفضت كويت ------------- حتى الطبيخ سويت
غير الابرة و الخيط ----------- ونقش كعك و بسكويت
على الجنبين استويت --------- و مش قادر اقول مليت
-----------------------------------------------------------
اخذت مع نفسى و عطيت -------- و طال بيننا الحديت
على الماضى بصيت ----- خجلت من نفسى و اتخزيت
كم استهترت و اتشاقيت ----- و على كم وصية اعتديت
وكم معصية اشتهيت --------- و كم فى الاغراء هويت
-----------------------------------------------------------
غوصت بفكرى و قبيت --------- و فكرت انى انتهيت
وقولت كم الف ياليت ---------- لقيتنى بالرجاء انحنيت
و من اعماق قلبى صليت ------ لقيتنى من كربى هديت
ذهنى صفي و اهتديت -------- ان الحجر رسالة تبكيت
بقلمى يوسف ونيس مجلع --- مصر