( عايزين نخش دنيا)
عايزين نخش دنيا
ونتلم بأه م الشوارع
صاحبنا علا و دينا ودنيا
ووقتنا بقي كله ضايع
وصراع مع الايام
لا فيه غالب ولا مغلوب
والدنيا بقت ماشية
معانا بالمقلوب
******************
بلاش المهر العالي
د الدهب يا نسايبي
بقي غالي
وانا لسه معرفشي
مين عيالي
عايزين اوضة للاطفال
بقي د اسمه كلام؟
واديني في صراع
مع الايام
ولا غالب ولا مغلوب
والدنيا ماشيا معايا
بالمقلوب
*****************
وفرح في نادي كبير
علشان عم العروسة
الباشا الوزير
ومعاه ناس كتير مهمين
وعقلي م الحساب هيطير
جري ايه يا نسايبي
هيا بيعة وشروة
وغالب او مغلوب
د انا لسة الدنيا
ماشيا معايا بالمقلوب
********************
اصلي عيلتنا ميتين نفر
كلهم لوءات مفهمشي غفر
والفرح البسيط علي
سمعتنا خطر
خليك في مستوانا
يا حبيب
ربنا يهديكي يا حماتي
دانا اللي تبقي نسيب وقريب
هيا بيعة وشروة
ولا غالب ومغلوب
انا لسة الدنيا ماشيا
معايا بالمقلوب
****"******************
تلاجتين وغسالتين وشاشتين
وستاير وحساب في البنك ساير
واتنين تليفزيون
وقايمة بنص مليون
وانا بالقسط جيت التليفون
جري ايه يا حماتي
هيا بيعة وشروة
ولا غالب ومغلوب
والله لسة الدنيا
ماشيا معايا بالمقلوب
**********************"
ولا اجرة الكوافير
شوية بوية بقرشين
ادفع فيهم الف والفين
وفي الاخر يجيبولي
واحدة تانية
معرفهاش منين
طيب يرضي مين ده يا حماتي
هيا بيعة وشروة
ولا غالب ومغلوب
د انا لسة الدنيا ماشيا
معايا بالمقلوب
**********************
يجري ايه يا حماتي
لو عملنا فرح زي
فرحك زمان
من غير فشخرة كدابة وهيلمان
وعفش بسيط نكمله مع الايام
وشقة صغيرة علي انا
اوضتين ومطبخ وحمام
ولما تضحكلنا الدنيا
نشتري الفيلا والعربية كمان
ونجيبك تونسينا
وتربي معانا العيال
اه لو وافقتي يا حماتي
يا سلام
يبقي ده الكلام المعقول
والدنيا تمشي معايا
ومع بنتك بالمعدوووووول
**********************
احمد شكري