وياريتها توصل بس ليكم
وخلى بالك ياللى عليك القصد والنية
الإنسانية
*********
الإنسانية ..
كلمة وتاهت
زي غيرها من الكلام
حرية .. عدل ..
أو حتى إنصاف واهتمام
معانىي راحت ، ومنّا تاهت ..
ولاّ هِربت م القلوب ..
حتى القلوب تِعبت
وراح منها السلام
وسلام مربع ..
لكل معنى بينّا دام
ذُل ماشي .. جرح ماشي ..
ولاّ غدر علينا هام ..
فى الوش معنى ..
واللى يبعنا من غير كلام
والصبر كان مفتاح فرج
حتى الفرج ..
سابنا وراح من غير سلام
وسلام سلاح ..
للقسوة لمّا سيطرت ..
والضعف شايل الاحترام
فاكرين زمان ..
طُهر القلوب ..
مَعنى وكان .. ياريته دام
امتى معانى الحب ترجع
والكُرهْ ينسانا بسلام
ترجع لنا من تاني روحنا
وروحنا يملاها الوئام
والعدل يرجع ..
عادة دايمة ع الدوام
والانسانية .. لو ليها نيّة
ترجع لنا من غير كلام
الانسانية .. لو ليها نيّة
ترجع لنا من غير كلام .......
****************************
من ديوان شقايق الروح 2020
صابر فرج ياسين