انك تسكت
ولا تنطقش
مع انك ميت
قدامهم
وف قلب النعش
اصل دموعك
ماتشبعش
المفروض
انك تفضل مستنى
المنه
او حبة حنه
من تحت تراب
العرش
تعملهم هدمه
وفرش
وسرير مليان مسامير
علشان ماتنمش
المفروض
انك تفضل شايل
وجعك
علشان مايوسخش
فى بلاط الساده
الامرا
اصحاب العرش
المفروض
يفضل عرقك
ياكل جلدك
ويصفى عينيك
ماتفتحش
عاوز تفضل عايش
طبق قوانين الغابه
انك جحش
تتحنى لما سيادته
يعدى
متنحش
اياك ترفع راسك
يوم احسن
تتنش
المفروض
برضه تراعى
فى احاسيسهم
متلبخش
المفروض انك
بنى ادم لخش
او زرع شيطانى
وسط غيطانهم
لازم يتحش
ايه يعنى أما جراحك
تاكل روحك
او حتى ماتفرحش
مش شرط
انك تحلم أو حلمك
ماطرحش
مش شرط انك تضحك
لو ضحكك
هيعكننهم
خليك فى النعش
يمكن هتلاقى
فى قبرك قلب
يحسك
او حد فى روحك
ماطمعش ....
أشرف الشناوى
شاعر عاميه
البرامون