سكة سفر,,,,,,, بقلم الشاعر علي عسكر

سكة سفر

لفيت بلاد وبلاد
من شرقها لغربها
ورويت السنين بالزاد
غربة ومرار دوقتها
وخدني الحنين ورجعت
وشبعت من حضنها

سكة سفر ومشيتها
وأمي ودعتها
وعتمة حياتي نسيتها
والضحكة ال هملتها
وف مركب قديمة ركبت
وهمومي حملتها

ومشينا في نص الليل
وحلم الشروق بيسافر
ومركب بتنقل جيل
من طوق الزمن بيعافر
لكن الولاد أهي رجعت
فاقده الحياه في الآخر

ادعيلي يامه وسامحيني
عمري يوم .. ما حسبتلها
لو كنتي يامه ضربتيني
كنت عمري ماهعملها

وأسلم نفسي لتجار موت
وأموت والسكة في أولها
واسيب أخواتي ومشاكلها
تعيشي واحدك تآسيها
وجهاز أختي ولوازمها
مين راح يامه يكفيها
وأخوها راجع في تابوت
وفراقه نار راح تكويها