رباعيات
(رباعيات الجندى المصرى)
الله أكبر الله أكبر بتهد الجبال
وتعمل فى قلوب العدا زلزال
الله أكبر رفعتنى على بارليف
وانا شايل على كتفى مدفع الميم دال
✌✌✌
النصر من الله بَعد العُده والتخطيط
النصر مش فَهلوه ولاحظ ولا طنطيط
اللى عليكى يامصر يجرأ ويتعدى
من الآخر غبى وغشيم وعبيط
✌✌✌
خير جنود الأرض بحديث الرسول
إحذر تقَرب يامعتدى م الغول
المصرى عشان مصر عاشق خروج الروح
ولسه تراب سينا بدمنا مبلول
✌✌✌
فضلت مخدوع بتقول مافيش قدك
وانك لاتقهر ولا نقدر على صَدك
أنا جُند مصر ماحد يكسرنى
وان كنت ناسى التاريخ أسأل أوام جِدك
✌✌✌
أكتوبر المجيد عايش فى القلوب ذكرى
وخِطته فى الكتب باقيّه للجيوش فِكره
عمرك ماتهزمنى إلا إذا
فات الجمل من فتحة الإبره
✌✌✌
لا تقولى تانى بارليف ولا تقولى شارون
اصحى وفوق م الوهم إحذرنى يامجنون
إعمل لغضبى وردعى ألف حساب وحساب
أنا مصرى أنا مختلف عن كل جُند الكون
✌✌✌
أنا حبى لمصر جوه الدماء ثابت
لأنى من نيلها وطينها من الجذور نابت
باحفر لكل عدو تحت القدم قبره
لا عمرى سِبت مصر ولا هيّا كمان سابت
✌✌✌
أنا جند مصر معروف بجبـروتى
وعشان ترابها يرخص لها مـوتى
أنا اللى ساعة الحروب فوق ماتتصور
وانا إللى ساعة السكوت بَرّبِى لك حُوتى
✌✌✌
فى البر والجو والبحر ليَا أسود وأسود
فى الصمود والتحدى مالى مثيل موجود
ببأه بحور من لهب ببأه جحيم ورعود
على كل من يِعتِدى أو يوم يمس الحدود
✌✌✌
أكتوبر المجيد نصر هز الوجود
وشرف لجيشنا طول الزمان ممدود
ومهما قلنا لجيشنا مانوفيش
وكلامنا هيبأه فى الإنتصار محدود
✌✌✌
أنا جُند مصر اللى أهلها فى رباط
مسلمين فى محبه عايشين مع الأقباط
لا فتنه ولا إرهاب فينا هيأثر
مصر بحفظ الله أمنها متحاط
🌙+ 🌙+
رباعيات
شاعرالإحساس
رضاعبدالحميد