مشهد اشبه بالحقيقه وبيتكرر
بطله المشهد بنت أصول وبتصبر
والبطل كالعاده ابن حلال و بيعافر
ومابين المشهد والحقيقه حجات اكتر
اولها إخلاص وغيره عمرها مابتتغير
قلب ساكن معانا وجسم متغرب او مهاجر
وبنت أصول صاينه الود ولا بتغدر
لا ليها ف خيانه ولا عمر قلبها فكر
اللي حبها كان قلبه مليان اخلاص
وعمره مكان مُستهتر ولا بصاص
شاف فيها منبع اخلاق بمال الدنيا مايتقدر
ومهما الزمن مال عليه عمرها م تتبتر
الواد كان تربيه ابوه اللي رباه على الهيبه
وعلى بنت الأصول عمره مايتكبر
يرضى بقليله ويقول دي نعمه من عنده
ويكافح لحد مايوصل ولا عمره ف يوم بيتمنظر
بيشوف المُغريات في الطريق أشكال والوان
بس عشان اللي ساكنه قلبه بتدلل وتتمخطر
روحها بتبعده فبيتلاشي اي طريق شمال
ويكمل دوغري سِكته لحد مايوصل بيه الأمان بَر
بيشوفها في مرايته كل ليله قبل ماينام
وبيصحي يصبح عليها بينه وبين نفسه ويمر
يكمل في الحياه معافره وقلبه مستني الايام تمر
ماشي في طريقه عدل مهو ابن حلال وحر
بيدوق مراره الايام وبيتحلي بجبال صبر
رافع رايه الكفاح وعمره مستسلم ولا مل
مهما ايديه اتشققت ومهما داق المُر
ناوي تكون حلاله من عرق جبينه وبيتحمل
ف شايفها هيا كل أحلامه ومستنى الفرحه تهل
مستني يشوفها قدامه بفستان ابيض تطل
أصله هو كان شايف فيها حنان أشبه بحنان الأم
وهيا شيفاه ابوها شايفه فيه السند والضِل
مهو الفرق شاسع مابين بنت الأصول وبنت الذُلْ
مقارنه صعبه مابين بنت اتربت على ايد راجل
وبنت تانيه واخداها كعب داير على كل لون تطل
تربيه عيل سايبها ع حل شعرها تدوق الذل
سيبك من اللي فات اعتبره مات
دا بكره الاحلى اكيد جي
كمل طريقك من سكات وافرح
دا ربك بعتلك ملاك بنت أصول ملهاش زي
#الشاعر_عابدين_ابوالخير
#المشهد_المتكرر
اتمنى تنول اعجابكم