ياللي عايش طول حياتك
تكتم الوجع اللي فيك
ألف مره بتتوجع
ولا حد يحس بيك
ماانت طيب حتي طيبتك
بردو مش لايقه عليك
فيك حكايه ألف عاشق
الف دمعه بين عينيك
💔💔
ولو علي قد شيل الهم
أديك شايل حمول غيرك ولا بيبان
أديك عايشها بالضحكه
وجواك حمل أحزان
ماهو اللي ملامحه مرسومه علي الفرحه
وضحكته صافيه ملازماه
بتبقي الدنيا تعباه
وجواه حاجه واجعاه
ولما بكون كتير سارح
لا كل الناس تكون حساه
أنا الولد اللي متصاحب علي الوحده
أنا اللي مشاعره لا بتقسا ولا جاحده
وانا اللي بيدور علي حبيبته
ولا لاقي في وصفها واحداه
🔻🔻🔻🔻🔻🔻🔻🔻
يا مربوط بالقدر إبكي
مع حالك ومن جواك
بلاش تضعف في يوم تشكي
لناس ولا عمرها حباك
لا طيبتك في الزمن دا تعيش
ولا تسوا. ولو ببلاش
دي حتي الدنيا مابتديش
فمنها خلاص ماتستناش
وأه علي إنكسر من الهم
ولا بيشكي ولا بيبوح
ولا بيحكي ولا بينوح
أنا هو اللي عاش غربه
كطير طاير لكن مدبوح
أنا اللي بغربته مسجون
وبلده تذله مش عايزاه
أنا اللي حبها بجنون
لكن هي كتير كرهاه
عشان فاقري ومابيدوش
لا عامله حساب ولا فاكراه
وحتي الغربه ماسابتهوش
دي زي الموت كمان شداه
أنا تعبان
أنا شايل حمول غيري ولا بيبان
أنا اللي ضحكه جوايا بتتغلب علي الأحزان
أنا اللي راضي بنصيبه
ولا اتبطر بروح جاحده
وانا اللي مستني حبيبه
ومش لاقي ولا واحده
أنا حكايه عايشها كتير
بتداري مابين زحمه
وانا اللي معايا ناس و كتير
لكنه راضي بالوحده
===============
احمد طلبه