قالولى لبسوا الدهب
و إن الدهب غالى
و إن اللى من غير أصل
اتربوا ع الغالى
انا قلت كفاياكم
خلونى أنا فى حالى
من امتى كانت المية
بتجرى فى العالى !!
قالولى سكنوا القصور ...
أنا قلت و أنا مالى ؟!
قالولى ضحكالهم الدنيا بزيادة .
و موسعة فى مالهم
أكتر من العادة
أنا قولت يا أهل الله
فارقونى بزيادة
إن شا الله يكلوا الشهد
و أشربها أنا سادة
لا أنا كنت باصص ليهم
و لا طبع عينى حسادة
قالولى غير المال كترت
أوى عيالهم
و الخير ماكانش فى يوم
يخطر على بالهم
أنا قولت يديهم
و إن شا الله يهنالهم
يا إخوانا يهديكم .
. مالى أنا و مالهم
أنا عمرى رزقى ما كان
مربوط على حبالهم
فلا يوم هبصلهم
و لا عمرى حسبهالهم
قالولى هو الهرم اتغيرت عدلته ؟!!
ازاى قليل الأصل ييقى على قمته ؟!!
انا قولت أصل الزمن ده زمن اللى باع ذمته
كان همه يجمع مال
و يوصله محطته
لكن لقصر النظر
كانت الأصول عدته
و إن الأصيل يكفيه
إن الأصول مذهبه
و إن الزمن لو طال
و فى المحن جربه
عمر الأصول ما تهون
على اللى الأصول مأربه
أما اللى من غير أصل بكرة الزمن يتعبه
و أما يميل الحال
يجى للأصيل ملعبه
لما الزمن يحنيه
يجى للأصيل طاير
و ابن الأصول الزين
عمره ما كان جاير
و عمره فى المحنة
ما يذل و يعاير
لكن الخسيس
مافهمش
ان الزمن داير
.👇.
👈ان الزمن داير